造美人:沒有醜女人,只有不夠努力的女人!

追求靚係女人一生嘅事業

平時好鐘意睇真人騷,尢其係扮靚嘅,短短幾個月共同見證住參賽者嘅變化,覺得好勵志!對於12位參賽者有唔同嘅睇法,有啲由一出埸已經好標青,有哂護膚意識,個底打得好好;有啲就係比較不堪入目,一出埸已經睇到皮膚出哂事,身材走哂樣,相當可怕!我比較期待見到後者嘅改變,因為佢地只要肯行出第一步,跟住落黎嘅改變都會好大!

Kathy:
我每晚都敷面膜,身上每一寸皮膚都會塗護膚品,也對飲食非常小心。

Kathy應該係12位參賽者之中最為標青果位,本身自己已經好有極強護膚意識,對自己外表要求亦高,唯一需要改善可能就只有下半身唔夠完美。相信節目比佢入選嘅最大原因係為左激勵其他參賽者,可能係作為一個榜樣般嘅存在。外在黎講,佢的確無咩缺點可言,但可能因為覺得自己比其他人優秀,感覺佢係節目中有時顯得太高傲嘅感覺,同埋節目組比佢出鏡”Show off”嘅片段比其他人亦特別多(沙排個集),靚女就有特別優待?

OK姐:
我畀時間自己逐步逐步嚟,唔會強迫自己,方法、決心同目標……我冇咁進取,曾經努力過咪算囉!


每個人都有自己嘅步伐嘅節奏,有快有慢好正常,其實我覺得OK姐好有性格,只係佢同呢個節目嘅價值觀有太大差距姐。有啲人天生麗質但都唔覺得自己靚,亦有人天生個樣麻麻(大眾眼光)但覺得自己好OK,OK姐就係一大代表,識得愛自己同跟隨自己內心而行係一件好事,亦係難得嘅事,人生苦短,活得令自己開心係好重要啊!我係OK姐身上領悟到嘅人生道理.

芷橋:
我要做到一個合格的女人,或者一個特別嘅女人,我真係需要更多努力去變靚,我先有資格成為一個女人。

望到呢位參賽者成日情緒崩潰,更明白到咩係可憐的人必有可恨之處,節目中佢成日將自己打造成一個受害人角色,過往比人飛,比人笑,比人欺凌嘅事一一訴說出黎,聽到呢個女仔遭遇到呢種事自然登佢心酸,但另一方面又見到佢係連登比人起底爆料,以前佢自己亦做過呢種事,但永遠將自己嘅缺點縮細,將自己可憐嘅事放大,比人觀感有啲難睇,成日大喊博同情咁,偏離左努力扮靚愛自己嘅主題,反而太沉著於過往唔開心嘅事上。

其實以上三位係我無諗過佢地會入到12強的,但當佢地入到之後嘅表現令我有新嘅睇法,明白點解十強時有啲人留得低,有啲人留不低。
先講講長勝公主Kathy,當初見佢Package咁fit根本覺得無咩改善空間,但望耐左佢個身形其實真係無咩線條美,見到佢做運動個啲賣力鏡頭又真係睇得出佢好落力,見到佢keep住一顆”幾多歲都要靚嘅心態”又的確令人好佩服,唔怪得評審們比個機會佢留低,變得愈黎愈靚啦!

講到大喊包芷橋,始終都成30歲人,唔少觀眾見到佢成日喊都有啲煩厭,睇到出佢好想令自己變靚,但係用錯哂方法,心態亦都好脆弱,不過見佢比人淘汰個陣聽到佢話唔會再整容,都有啲安慰,希望佢退出左節目之後繼續努力做運動keep fit啦,身形一變瘦,成個體態都會唔同好多!

最後就係以為自己好OK嘅OK姐,企係個人角度黎睇,充滿自信係好事,但出到黎面對評審觀眾就好難再活係自我嘅框框入面,雖然我好欣賞佢呢份自信心,但過份自信就係自大,加上由一開始佢自介個陣已經覺得佢唔識大體同埋白撞Feel,唔明點解比左佢入選,因為見唔到佢好渴求變靚,只係想執少少R資源咁嘅心態唔太睇好,結果入到去個外表同性格真係無咩大轉變,依然係放飛自我嘅OK姐,可能係個節目唔多岩佢啦,可惜!

發表評論

你的電郵地址並不會被公開。 必要欄位標記為 *

zh_HKChinese