[小編實測] 一文看清美容院鎖售手法及常見陷阱 | 3間單次收費美容院推介

一講到美容院，相信大家都會諗到一啲黑心嘅鎖售手法，以前新聞或者會見到一啲美容顧問會選擇疲勞轟炸同威迫硬銷療程；例如係療程期間不斷游說客人，令到客人疲倦或者意識唔清晰嘅時候購買。但呢啲硬銷手法已經係過去式，一齊睇下而家小編整理某啲黑心嘅美容院會有乜新招式啦！

第一招：個別美容療程享有極平試做價

用極平試做價吸引客人光顧美容院，之後話符合優惠價嘅療程唔適合客人，繼而推薦更加貴嘅美容療程；又或者，當客人享用完使用之後，不斷游說客人購買大量療程次數（俗稱package價）；而過程當中，美容顧問會不斷問你：「上得嚟試做，都係有興趣同想變靚變好㗎嘛，呢個美容療程咁好咁抵，其實仲要考慮啲咩呢？」令客人感到唔好意思。

第二招：罔顧客人的皮膚需要，盲目推銷療程！

一啲美容院會罔顧客人皮膚嘅真正需要、盲目推銷療程，於是出現買錯療程又或者需要加購其他療程嘅情況。例如明明係皮膚缺水但就選擇左膠原療程，買左唔適合自己的療程；唔單止無辦法改善皮膚質素，甚至會引起不必要嘅皮膚問題！

第三招：做皮膚診斷嘅時候，美容顧問會不斷提出新嘅問題。

做療程嘅時候，會不斷話你皮膚差，甚至講到再唔處理呢個問題，後果會好嚴重。好嘅美容師的確係會按客人既皮膚問題而建議適合療程，但唔係不斷將小事化大，甚至為咗令客人願意購買療程而打擊客人嘅自信心。

第四招：每次都會撞正有優惠，而家唔買就會好可惜！

每次去美容院都會撞正大優惠？一個幾萬蚊嘅美容療程，今日買只需要半價，諗諗下就覺得心動！當去得多美容院之後，就會開始發現原來幾乎去親都會有優惠；包括週年優惠、所有不同節日優惠、春夏秋冬優惠，個個月都有優惠，而每個優惠既重點到最後都係要洗錢！

第五招：誇張失實的美容效果

小編試過做微波溶脂，其實係美容院第一次做完療程，自己望住塊鏡真係睇唔到有乜變化，但美容院顧問都會用好誇張既眼神或者聲音同你講：「睇下你個手臂有咗幾多！背隻嚿肉直頭唔見咗！」等等，即使自己真的感覺唔到，但美容院嘅人要洗腦你呢個療程係work嘅，接住就又再Sell客人購買美容療程。跟住又再Sell你購買美容療程！

第六招：為左要客人購買美容療程，困住你幾個鐘！

小編親身經歷，諗住做完療程就可以離開，結果美容顧問一定要小編坐低慢慢傾、討論皮膚狀況同建議小編購買其他療程，過程長達兩小時。期間小編一直拒絕，但美容顧問一直唔肯開張單同結束；最後小編直接話自己冇錢買，個顧問居然叫小編碌卡同自己搞分期、甚至建議小編分期兩年去付款。期間小編一直拒絕，個間大型美容院嘅顧問一直唔肯「放行」，直至到小編都累了唔想糾纏在事情上，妥協購買部份療程為止。

第七招：預約唔到療程，但新客就預約到。

有啲不良美容院，收到錢之後，太多開始變差。而顧問發現客人冇再消費後，竟然唔比客人預約療程，又或要早成一個月甚至早2個月預約，如果期間有事嚟唔到又要從頭再約時間。甚至有啲美容院，想令買咗大量格數嘅客人喺限期內用唔曬啲療程，以降低美容院成本。

面對平價嘅美容廣告，首先要保持冷靜，唔好被廣告上嘅「超筍價」影響你嘅判斷力！要知道美容院需要嘅成本絕對唔少，絕對唔會咁好心益你！價錢，都絕對唔係選擇美容療程嘅唯一準則，安全度、有效性、服務質素先係最重要的！但如果真係擔心自己俾人hard sell，當然可以選擇設有單人收費嘅美容院，咁就唔需要擔心自己會身陷險境！