香港人必學護膚流程懶人包 一文睇清基本到進階保養

各位姊妹！係咪成日覺得買咗一堆貴價護膚品，但係用極塊面都係唔見起色？仲有時會生粒粒甚至愈搽愈乾？好大可能係你個護膚步驟出咗問題。今日就同大家拆解，點樣用最正確嘅順序，令你每滴精華同面霜都發揮到最大功效，仲會教埋「早C晚A」，同埋幾時需要去美容院保養塊面。想行少啲冤枉路？睇完呢篇文章包你慳錢又見效。

早晚護膚大不同

好多人以為一支洗面奶走天涯就搞掂，其實皮膚日夜需求係唔一樣咖。

早上護膚流程 (重點：防禦 + 抗氧化）

第一步潔面：可以用溫和潔面乳或清水洗面就夠，因為夜晚瞓覺時，皮膚只有自身分泌嘅油脂，過度清潔反而會破壞皮脂膜。

第二步化妝水：將爽膚水倒少少係化妝棉再輕輕擦拭面部。除咗可以帶走殘留嘅老化角質同污垢，仲可以補充水分，令皮膚吸收到之後嘅保養品。

第三步精華：跟據自己想改善嘅皮膚問題去選擇精華，例如美白精華、淡斑精華等等

第四步乳液：可以形成保護膜，為肌膚鎖水同補水，

第五步防曬：係最重要一步！如果唔係用緊有足夠SPF嘅日霜，就一定要搽防曬。防止因為紫外線而令皮膚老化同出現色斑

夜晚護膚流程 (重點：修護 + 進補）

第一步卸妝與潔面：如果有搽防曬或者化妝，就要用卸妝產品先卸一次先。然後再用潔面乳，徹底洗走污垢。

第二步化妝水：道理同朝早一樣，平衡返肌膚ph值，補充水分

第三步精華：夜晚係皮膚黃金修復期，可以疊加使用唔同功效嘅精華，例如先美白後抗皺。

第四步眼霜：輕輕搽係眼周就可以。

第五步面霜： 鎖住水分與養分，減少夜晚水份流失

護膚時注意事項

順序：記住「先水、後精華、再面霜」。質地愈水愈輕薄嘅行先。
唔好貪心：每星期做1-2次深層清潔去角質，每星期敷2-3 次面膜就夠。
敏感肌：避免使用含酒精、香精同高濃度酸類產品
選擇適合自己嘅護膚品：油性肌揀清爽嘅Gel狀產品；乾性肌就要滋潤嘅面霜或精華。冇一套產品係適合所有人，最緊要了解自己塊面需要啲咩。

「早C晚A」法則

想效果再昇華？可以試下「早C晚A」護膚法

早C：朝早用維他命C產品，例如精華﹑乳液。有助抗氧化劑，可以對抗日間紫外線同污染產生嘅自由基，同時提亮膚色，對抗暗沉。

晚A：夜晚用維他命A醇產品。A醇可以加速皮膚新陳代謝，刺激膠原蛋白增生，有效抗衰老、撫平細紋、收細毛孔。但A醇係岩岩使用初期機會脫皮、發紅，所以應該由低濃度開始。

點解要去美容院做療程？

就算你屋企護膚做到足，有些功夫都係美容院先做到。基本美容療程就好似幫你塊面做一次深度大掃除同深層補濕咁。

常見有Aqua Peel水漾煥膚、Bellasonic雙頻無針水注等。呢啲主要針對表皮層，幫你清走平時洗面捽極都唔出嘅毛孔污垢，同將保濕成分直接導入底層。
建議每3至4個星期一次，就啱返皮膚細胞更新嘅週期。

去美容院最大好處係可以做到真正嘅「肌膚大掃除」同調節「水油平衡」，尤其對於香港嘅潮濕天氣同空氣污染，定期做機清一清，可以令屋企護膚品吸收得更好，塊面自然冇咁易油光滿面。

靚皮膚係「習慣」養出嚟

護膚從來冇一步登天，最緊要係跟對步驟、揀對產品、持之以恆。記住朝早重防禦，夜晚重修護；每星期做下去角質；同埋每個月考慮下交俾美容院皮膚管理。搞清呢套邏輯，你就會發現，唔使盲目追最貴嘅產品，都可以養返一副健康又光亮嘅好皮膚！